Archive for ఏప్రిల్, 2017
అదృష్టం – దురదృష్టం – జీవితం
అదృష్టం – మనల్ని ప్రేమించే వాళ్ళు మన చెంత ఉండడం
దురదృష్టం – ప్రేమిస్తున్నట్టు భ్రమ సృష్టించి మనకు విలువ, మన మాటలకు గౌరవం ఇవ్వని వాళ్ళను చెంత చేరనీయడం
దురదృష్టం వల్ల అదృష్టం మాసిపోదు
అదృష్టం వల్ల దురదృష్టం కానరాకుండాపోదు
అదృష్టం జీవితాన్ని ఆనందంగా జీవించే స్పూర్తినిస్తుంది
దురదృష్టం జీవితంలోని చేదు అనుభవాలను ఎదుర్కొని ముందున్న అదృష్టాలను అన్వేషించాలన్న గుణపాఠాన్ని మర్మంగా ఉంచుతుంది
అది గ్రహించి ముందుకు వెళ్లగలిగితే జీవితంలోని పరమానందాన్ని అందుకునే అవకాశం లభిస్తుంది
నిగ్రహంగా ఆగ్రహావేశాలకు దాసోహమవ్వక లాభామాశించక నష్టాన్ని ఇష్టమైనంత కుదించి నిరీక్షించాలి
కపట మాటల తూటాలతో కర్కశ కాట్లతో మనోభావాలని మోదుతుంటే తట్టుకుని ఉండడం తప్పనిసరి!
ఎడారిలో ఎండకు ఆవిరవ్వక ఎండమావులచే వంచించబడక బీడుబారిన గుండెలకు సైతం ఊపిరి లాంటి జీవ జలాలకై శోధించాలి
జీవన పోరాటంలో విజయభేరీ మ్రోగేవరకు వెనుకంజ వెకిలిగా నవ్వినా పెడచెవిన పెట్టి కాలుదువ్వాలి!
వెర్రి చేష్టలతో విర్రవీగే వంచకులెందరున్నా, కునుకు కరువైన కళ్ళతో క్రోధాన్ని కబళించి కాళరాతిరైనా కాలయాపన చేయాలి!
కల్పతరువువంటి జీవితాన్ని వెలికితీయాలి! జీవేచ్ఛను ప్రబలించాలి!!
ఇటీవలి వ్యాఖ్యలు