అమితమైన ప్రలాపం

మృదు మోముతో మురిపెముగా మది దోచగా
అమృత వాక్కులు వెలువడెను ఈ గాత్రమున!!
సుందర వదనమున దాగి ఉంది మత్తు.. గమ్మత్తైన విపత్తు!
ఈ వృత్తాంతమునకు ఆకృతినీయుచు రచించెనీ గానమును!!
శృతిలో ఈ కృతినాలపించగా…
కర్ణమునకు వర్ణనాతీతానుభుతి!!
చెదరని చిరునవ్వుతో…
నివ్వెరబోయె నయనం!!
మధురమైన పలుకులు…
ఈ హృదయమందు పదిలం!!
ఊహలను అల్లికగా మలచి…
నిర్విరామముగా నివేదించ కృషిచేసినా…
తుది తోచలేదు!
ఇది నిరంతరం తీరం తాకే తరంగం!
నిష్క్రమించని తలపుల తరంగం!!
ఎంత ప్రయాణించినా చేరలేని గమ్యం!
ఎంత ప్రయాసపడినా పూర్తిచేయలేని కావ్యం!!